Үгүлээккэ хапсаҕай кулун тутар 18-19 күннэригэр.
ҮГҮЛЭЭККЭ ХАПСАҔАЙ…
Кулун тутар ый 18-19 күннэригэр Үгүлээккэ Күүлэт түбэтин маастардарын бирииһигэр улуустааҕы комплекснай спартакиада чэрчитинэн хапсаҕайдаһан тустууга күрэхтэһии тэриллэн үрдүк таһымҥа ааста.Күрэхтэһиини сүрүн суудьуйаннан хапсаҕайга Бүлүү улууһун сборнай хамаандатын тренерэ Соловьев Виктор Афанасьевич, сэкэрэтээринэн Хаҕын нэһилиэгин тренерэ Алексеев Филип Мартович уонна комментаторынан улуус Спорткомитетын салайааччыта Гаврил Степанович Евсеев эҥкилэ суох иилээн-саҕалаан ыыттылар.
Улууска Күүлэт түбэтэ саамай элбэх успуорт маастардаах түбэннэн биллэр,ол иһигэр Үгүлээт нэһилиэгэ түөрт успуорт маастардаахпыт,Афанасьев Николай Прокопьевич көҥүл тустууга Сэбиэскэй Сойуус успуордун маастара,Петров Анатолий Михайлович,Николаев Семен Егорович,Маисов Кэскил Мичильевич хапсаҕайдаһан тустууга Саха сирин успуордун маастардара буолаллар.
Бу күрэхтэһиигэ Бүлүү куоратыттан уонна улуус нэһилиэктэриттэн барыта уон биэс хамаанда кытынна,ол иһигэр Үгүлээттэр толорута суох да буоллар тэрийээччи нэһилиэк буоларбыт быһыытынан икки хамаанданы бэлэмнээн туруордубут. Барыта холбоон 120 бөҕөс күөн көрүстэ,ол иһигэр уон түөрт успуорт маастара күрэхтэһиигэ кытыннылар.
Икки күннээх сытыы хапсыһыылар түмүктэринэн хамаанданнан уопсай түмүккэ бастакы миэстэҕэ Бүлүү куоратын күүстээх хамаандата таҕыста,иккис миэстэҕэ бэрт кыраннан хаалан Үгүлээт нэһилиэгин бастакы хамаандата таҕыста,үһүс бириистээх миэстэҕэ Хаҕын нэһилиэгин хамаандата таҕыста.
Үгүлээт бастакы хамаандатыттан миэстэҕэ тигистилэр:
Оҕолорго:
Дьулусхан Мандаров 50 кг 2 миэстэ,
Протопопов Даниил 55 кг 2 миэстэ,
Бочаров Аким 80 кг 3 миэстэ,
Прокопьев Ваня 80 кг үөһээ 1 миэстэ буоллулар.
Улахан дьоҥҥо:
Егоров Александр 57 кг 1 миэстэ,
Долгунов Афанасий 85 кг 3 миэстэ буоллулар.
Бэтэрээннэргэ:
Николаев Семен 80 кг 2 миэстэ буолла.
Ыйааһыннарынан хапсыһыылар түмүктэммиттэрин кэннэ алта Муҥутуур кыайыылааҕы быһаарар киирсиилэр буоллулар.
Оҕолорго Муҥутуур кыайыылааҕынан буолла Хаҕынтан Арылхан Григорьев уонна улуус баһылыга Винокуров Сергей Николаевич туруорбут 20 000 солкуобайынан наҕараадаланна.
Бэтэрээннэргэ Муҥутуур кыайыылааҕынан буолла Халбаакыттан успуорт маастара Константин Мандаров уонна Тылгыны нэһилиэгэ(баһылык Иванов Егор Афанасьевич)туруорбут убаһатынан наҕараадаланна.
Хапсаҕайдаһан тустууга маастара суох 75 киилэҕэ диэри ыйааһыннаах бөҕөстөргө Муҥутуур кыайыылааҕынан буолла Бүлүү куорат бөҕөһө Мичил Осипов уонна Бастакы Күүлэт нэһилиэгэ(баһылык Новиков Айаал Петрович)туруорбут убаһатынан наҕараадаланна.
Маастара суох 75 киилэттэн үөһээ Муҥутуур кыайыылааҕынан буолла Бүлүү куорат бөҕөһө Александр Алексеев уонна Иккис Күүлэт(баһылык Спирдонов Юрий Иванович)туруорбут убаһатынан наҕараадаланна.
Маастардар кыттыылаах 65 киилэҕэ диэри ыйааһыннаах бөҕөстөргө Муҥутуур кыайыылааҕынан буолла Тааһаҕартан успуорт маастара Федор Харлампьев уонна Үгүлээт нэһилиэгэ туруорбут 20 000 солк.харчыннан наҕараадаланна.
Маастардар кыттыылаах 65 киилэттэн үөһээ ыйааһыннаах бөҕөстөргө Муҥутуур кыайыылааҕынан буолла Дьөккөнтөн успуорт маастара Николай Николаев уонна Үгүлээт нэһилиэгэ(баһылык Лукин Октябрь Иванович)туруорбут убаһатынан наҕараадаланна.
Дьэ,ити курдук 17 ыйааһыҥҥа сыаналаах бириистэрдээх,түөрт убаһа уонна 40 000 солк.сууммалаах бириистэр туруоруллубут алта Муҥутуур кыайыылааҕы быһаарар хапсыһыылаах Бүлүү улууһугар,баҕар Саха сиригэр да буолуо хаһан да ыытыллыбатах Бүлүү улууһун саамай уһук хоту сытар,булдунан-балыгынан,кэрэ айылҕалааҕынан,ыалдьытымсах дьоннооҕунан аатырбыт Үгүлээт нэһилиэгэр үһүс төгүлүн тэриллибит хапсаҕайдаһан тустууга Күүлэт түбэтин маастардарын бирииһигэр,Саха сиригэр физкультурнай хамсааһын саҕаламмыта 100 сылыгар уонна Үгүлээт нэһилиэгэр Патриотизм сылыгар аналлаах улуустааҕы Спартакиада түмүктэннэ.
Элбэх тэрилтэлэр уонна биирдиилээн дьон спонсордаатылар,кинилэргэ барыларыгар,убаһалары туруорбут Күүлэт түбэтин нэһилиэктэрин олохтоохторугар,аҕа баһылыктарыгар, ону кытта успуорт маастардарын уонна Үгүлээт нэһилиэгэр биир бастакыннан тренеринэн үлэлээбит Павлов Федор Федорович оҕолоругар, тустууктары дьиэлэригэр түһэрбит,ас астаан буфеты тэрийэн үлэлэппит,икки күн хамаандабытыгар «ыалдьыбыт» нэһилиэкпит олохтоохторугар Олохтоох дьаһалта аатыттан барҕа махталбытын тириэрдэбит.Өссө да нэһилиэкпит,улууспут сайдарын туһугар түмсүүлээх буолуоххайыҥ.
Байрон Иванов.
Бүлүү,Үгүлээт.